5 raste të reja me COVID-19 në
Ferizaj, janë konfirmuar mbrëmë nga Instituti Kombëtar i Shëndetit Publik,
duke e çuar kështu në 65 numrin e rasteve aktive me koronavirus në Ferizaj,
ndërsa në spitalin e këtushëm janë të shtrirë 3 persona të cilët po
trajtohen me oskigjeno-terapi.
Drejtori i Spitalit të Ferizajt
Jeton Zeqiri, thotë se gjendja është alarmante, duke apeluar tek qytetarët
që të zbatojnë rekomandimet e Institutit Kombëtar të Shëndetit Publik.
”Unë mundem t’iu them lirisht që gjendja në qytetin tonë, por edhe
në nivel vendi është alarmante arsyeja është se kemi një rritje enorme të
rasteve të prekur nga COVID-19, kështu që e vetmja mundësi është që të
rrisim vigjilencën dhe ajo vigjilencë është mbajtja e maskave, distanca dhe
higjiena”, tha
Jeton Zeqiri, drejtor i Spitalit të Ferizajt.
Në anën tjetër, dy ditë më parë Qeveria
e Kosovës ka miratuar edhe një varg masash në luftën kundër përhapjes së
koronavirusit. Në mesin e masave përfshihet edhe bartja e maskave si obligim
për të gjithë qytetarët. Por, një gjë e tillë nuk po zbatohet në
Ferizaj. Në kafeteri e rrugë të qytetit shihen qytetarë duke lëvizur pa
maska e duke mos e mbajtur fare distancën fizike, e shpërfillje totale e
masave shihet nëpër markete. Megjithatë, Inspektorati komunal i Ferizajt
thotë se gjithçka është duke shkuar mirë.
”Sa kam informata të gjitha marketet,
të gjitha subjektet dhe gastronomët kanë filluar t’i praktikojnë masat
preventive dorëzat, maskat, distancën dhe kanë dezinfektant në çdo
subjekt, nëpër markete në bazë të raportimeve që i kam është shumë mirë”, tha Ridvan Berisha, kryeinspektor.
Për zbatimin e masave të miratuara
nga Qeveria është angazhuar edhe Policia.
“Gjobat janë në kompetencë të inspektorëve të komunës,
ndërsa ne u asistojmë kërkesave të tyre, kontrollimin e lokaleve, e të
ngjashme. Çdo kërkesë të Inspektoratit ne e vlerësojmë dhe deri më tani
nuk kemi pasur probleme sa i përket kapaciteteve, sepse kemi ekipe të
mjaftueshme policore për t’i dalë në asistim çdo kërkese të inspektoratit“, tha Agim Gashi, zëdhënës i
Policisë për Rajonin e Ferizajt.
Për moszbatimin eventual të
rekomandimeve të IKSHPK-së, inspektorët komunal do të veprojnë sipas ligjit për
parandalimin e sëmundjeve ngjitëse, ku në bazë të këtij ligji gjobat kalojnë shifrën e mbi 1 mijë eurove.
