Dy ekipet ferizajase, Ferizaj në kategorinë e femrave dhe Kastrioti të meshkujve, nesër në sallën “Bill Clinton” i zhvillojnë ndeshjet gjysmëfinale të Kupës së Kosovës. Prej orës 18:00, vashat e Ferizajt luajnë kundër Samadrexhës, derisa festa e hendbollit hapet në qytetin e hendbollit prej orës 14:00 me ndeshjen ndërmjet Istogut dhe Vushtrrisë. Ferizaj është kampion në fuqi i Kupës së Kosovës.

Prej orës 20:00 do të zhvillohet kryendeshja e festës së hendbollit në Ferizaj, kur do të përballen Kastrioti dhe Rahoveci. Kjo ndeshje llogaritet si finale para finales pasi dy skuadrat janë pretendentët kryesorë edhe për titullin e ligës.

Prej orës 16:00 në  gjysmëfinalen tjetër të meshkujve përballen Vushtrria dhe Besa Famgas.

Dy ekipet ferizajase janë të bindura se edhe sivjet trofetë do të mbesin në qytetin e hendbollit.

Pivotja Shkurta Mehmeti ka thënë se është privilegj dhe përgjegjësi për ferizajaset që t’i luajnë finalet në Ferizaj.

“Të luajmë para publikut tonë është privilegj, por edhe përgjegjësi. Jemi të motivuara dhe të përkushtuara që ta shfrytëzojmë këtë mundësi në maksimum. Synimi ynë është i qartë – të paraqitemi me krenari, të luftojmë për çdo top dhe të japim gjithçka në fushën e lojës në mënyrë që Kupa e Kosovës të mbetet në qytetin e hendbollit, në Ferizaj”, ka thënë Mehmeti për faqen zyrtare të Federatës së Hendbollit të Kosovës.

Edhe Lulzim Shabani, aloja e Kastriotit, ka thënë se “Ujqit” do të luftojnë fort në parket, që kupa të mbetet edhe sivjet në Ferizaj.

“Përgatitjet janë duke shkuar shumë mirë. Ka kohë që kemi menduar për këtë ‘Final 4’ dhe jemi përgatitur maksimalisht. Skuadra është në gjendje jashtëzakonisht të mirë fizike, e po ashtu në anën psikologjike jemi shumë të përgatitur dhe të vendosur që edhe këtë vit ta stolisim qytetin me trofeun e çmuar të Kupës së Kosovës”, ka theksuar Shabani për faqen zyrtare të FHK-së në Facebook.

“Do të jetë më e veçantë pasi turneu final organizohet në qytetin tonë, në qytetin e hendbollit. Premtojmë spektakël, duele të forta e shumë lojë të bukur për të gjithë sportdashësit që do të jenë në ‘Bill Clinton’. I ftoj gjithë qytetarët ferizajas dhe tifozët tanë ‘Ujqit’ që të na mbështesin në mënyrë masovike dhe si gjithmonë të tregojnë kulturë e mbështetje korrekte për ekipin tonë”, ka thënë Shabani.

Astronomja Pranvera Hyseni ka shënuar një arritje të jashtëzakonshme në nivelin ndërkombëtar, duke fituar çmimin “Dwornik” për prezantimin më të mirë oral nga një student në Konferencën Ndërkombëtare të Shkencave Planetare dhe Hënore 2025, të mbajtur në Houston të SHBA-ve.

Në mesin e mbi 2 mijë pjesëmarrësve nga mbarë bota, punimi i Hysenit është vlerësuar si më i dalluari nga Divizioni i Gjeologjisë Planetare i Shoqatës Gjeologjike të Amerikës (GSA) – një ndër çmimet më prestigjioze për studentët në këtë fushë.

Projekti i saj shkencor është fokusuar në shpërndarjen e lëndës organike në familjet e asteroideve, duke u mbështetur në të dhëna që ajo i mblodhi përmes teleskopit NASA Infrared Telescope Facility, të vendosur në ishujt Hauai.

Në një postim të shpërndarë në Facebook, Pranvera u shprehu mirënjohje të veçantë mentorëve të saj, Dr. Myriam Telus dhe Dr. Andrew Rivkin, për mbështetjen dhe besimin në punën e saj shkencore.

Ky vlerësim përfaqëson jo vetëm një moment historik personal për Hysenin, por edhe një dëshmi të fuqishme për potencialin e të rinjve nga Kosova në rangun e shkencës botërore

Pranvera Hyseni është kandidate për PhD e Studimeve Planetare pranë Universitetit Santa Cruz të Kalifornisë.

Ajo ishte nismëtare e OJQ “Astronomy Outreach of Kosova”, ndërsa me kontributin e saj u mundësua edhe ndërtimi i Observatorit dhe Planetariumit të parë në Kosovë, i vendosur në Rashincë të Shtimes.

Gjykata Themelore në Ferizaj të martën u ka caktuar një muaj paraburgim të dyshuarve H.B., R.M., V.Ç., E.L., Sh.K., dhe D.G., për vrasjen e rreshterit policor Muhamed Lika, më 1 prill në Kaçanik.

Ata akuzohen për veprën penale “vrasje e rëndë”.

Ndërkaq dje, Gjykata Themelore në Ferizaj, Departamenti për të mitur, ka aprovuar kërkesën e Prokurorisë Themelore të Ferizajt, për caktimin e masës prej një muaj paraburgim kundër të miturit R.B, si i dyshuar kryesor për këtë vrasje.

Sipas Prokurorisë, R.B. e ka përcjellë gjatë natës policin Muhamed Lika deri tek hyrja e banesës dhe pasi është nisur shkallëve, i dyshuari ka shtënë në drejtim të policit. Në vend të ngjarjes janë gjetur katër gëzhoja. Pas kryerjes së veprës, i pandehuri R.B. dyshohet se ka ikur në drejtim të një lokali ku ka takuar R.M., që dyshohet se po e priste dhe bashkë më pas kanë ikur.

Gjithashtu, nga incizimet prej vendit të ngjarjes dhe kamerave të sigurisë përreth janë kuptuar lëvizjet e të dyshuarve para, gjatë dhe pas aktit.

Që të gjashtë të dyshuarit u arrestuan të hënën gjatë një operacioni të gjerë policor në Kaçanik dhe u dërguan në mbajtje për 48 orë. Po të njëjtën ditë, policia kreu bastisje në 9 lokacione në Kaçanik dhe në një fshat të Klinës, duke sekuestruar dy vetura, telefona mobilë, disa laptop, një armë zyrtare, maska, tyta armesh dhe fishekë.