Dy ekipet ferizajase, Ferizaj në kategorinë e femrave dhe Kastrioti të meshkujve, nesër në sallën “Bill Clinton” i zhvillojnë ndeshjet gjysmëfinale të Kupës së Kosovës. Prej orës 18:00, vashat e Ferizajt luajnë kundër Samadrexhës, derisa festa e hendbollit hapet në qytetin e hendbollit prej orës 14:00 me ndeshjen ndërmjet Istogut dhe Vushtrrisë. Ferizaj është kampion në fuqi i Kupës së Kosovës.

Prej orës 20:00 do të zhvillohet kryendeshja e festës së hendbollit në Ferizaj, kur do të përballen Kastrioti dhe Rahoveci. Kjo ndeshje llogaritet si finale para finales pasi dy skuadrat janë pretendentët kryesorë edhe për titullin e ligës.

Prej orës 16:00 në  gjysmëfinalen tjetër të meshkujve përballen Vushtrria dhe Besa Famgas.

Dy ekipet ferizajase janë të bindura se edhe sivjet trofetë do të mbesin në qytetin e hendbollit.

Pivotja Shkurta Mehmeti ka thënë se është privilegj dhe përgjegjësi për ferizajaset që t’i luajnë finalet në Ferizaj.

“Të luajmë para publikut tonë është privilegj, por edhe përgjegjësi. Jemi të motivuara dhe të përkushtuara që ta shfrytëzojmë këtë mundësi në maksimum. Synimi ynë është i qartë – të paraqitemi me krenari, të luftojmë për çdo top dhe të japim gjithçka në fushën e lojës në mënyrë që Kupa e Kosovës të mbetet në qytetin e hendbollit, në Ferizaj”, ka thënë Mehmeti për faqen zyrtare të Federatës së Hendbollit të Kosovës.

Edhe Lulzim Shabani, aloja e Kastriotit, ka thënë se “Ujqit” do të luftojnë fort në parket, që kupa të mbetet edhe sivjet në Ferizaj.

“Përgatitjet janë duke shkuar shumë mirë. Ka kohë që kemi menduar për këtë ‘Final 4’ dhe jemi përgatitur maksimalisht. Skuadra është në gjendje jashtëzakonisht të mirë fizike, e po ashtu në anën psikologjike jemi shumë të përgatitur dhe të vendosur që edhe këtë vit ta stolisim qytetin me trofeun e çmuar të Kupës së Kosovës”, ka theksuar Shabani për faqen zyrtare të FHK-së në Facebook.

“Do të jetë më e veçantë pasi turneu final organizohet në qytetin tonë, në qytetin e hendbollit. Premtojmë spektakël, duele të forta e shumë lojë të bukur për të gjithë sportdashësit që do të jenë në ‘Bill Clinton’. I ftoj gjithë qytetarët ferizajas dhe tifozët tanë ‘Ujqit’ që të na mbështesin në mënyrë masovike dhe si gjithmonë të tregojnë kulturë e mbështetje korrekte për ekipin tonë”, ka thënë Shabani.

Gjykata Themelore në Ferizaj të martën u ka caktuar një muaj paraburgim të dyshuarve H.B., R.M., V.Ç., E.L., Sh.K., dhe D.G., për vrasjen e rreshterit policor Muhamed Lika, më 1 prill në Kaçanik.

Ata akuzohen për veprën penale “vrasje e rëndë”.

Ndërkaq dje, Gjykata Themelore në Ferizaj, Departamenti për të mitur, ka aprovuar kërkesën e Prokurorisë Themelore të Ferizajt, për caktimin e masës prej një muaj paraburgim kundër të miturit R.B, si i dyshuar kryesor për këtë vrasje.

Sipas Prokurorisë, R.B. e ka përcjellë gjatë natës policin Muhamed Lika deri tek hyrja e banesës dhe pasi është nisur shkallëve, i dyshuari ka shtënë në drejtim të policit. Në vend të ngjarjes janë gjetur katër gëzhoja. Pas kryerjes së veprës, i pandehuri R.B. dyshohet se ka ikur në drejtim të një lokali ku ka takuar R.M., që dyshohet se po e priste dhe bashkë më pas kanë ikur.

Gjithashtu, nga incizimet prej vendit të ngjarjes dhe kamerave të sigurisë përreth janë kuptuar lëvizjet e të dyshuarve para, gjatë dhe pas aktit.

Që të gjashtë të dyshuarit u arrestuan të hënën gjatë një operacioni të gjerë policor në Kaçanik dhe u dërguan në mbajtje për 48 orë. Po të njëjtën ditë, policia kreu bastisje në 9 lokacione në Kaçanik dhe në një fshat të Klinës, duke sekuestruar dy vetura, telefona mobilë, disa laptop, një armë zyrtare, maska, tyta armesh dhe fishekë.

Prokuroria Themelore ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarve: H.B., R.M., V.Ç., E.L., Sh.K., dhe D.G nga Kaçaniku, për shkak të dyshimit të veprës penale “Vrasja e rëndë”, të zyrtarit policor Muhamed Lika.  

Sipas Prokurorisë, ekziston dyshimi i bazuar se me datë 01.04.2025, rreth orës 23:00, në Kaçanik, në rrugën “Idriz Seferi”, përkatësisht në katin e II-të të hyrjes së ndërtesës, të pandehurit duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta tani të ndjerin zyrtarin e policisë, rreshterin Muhamed Lika ,me detyrë në Stacionin Policor në Kaçanik, ku viktima pas përfundimit të orarit të punës ora 22:53, rrugës për në banesën e tij, i njëjti ishte përcjell në vazhdimësi nga madhorët deri te hyrja e banesës së tij ku pasi që hynë në objektin e banesës ku ka jetuar duke u ngjitur shkallëve, i mituri i shkon nga mbrapa dhe pasi që viktima hynë në objektin banesor, i mituri me të takuar të ndjerin ka shtënë në drejtim të tij me armë zjarri.

Në vendngjarje janë gjetur katër gëzhoja të kalibrit 9.19 mm dhe nga plagët e marra nga predhat e armës së zjarrit,  viktima Muhamed Lika, ka ndërruar jetë.

Me këtë, në bashkëkryerje, të pandehurit do të kryenin veprën penale “Vrasje e rëndë”nga neni 173 paragrafi 1 nën paragrafi 1.9 lidhur me nenin 31 të Kodit Penal të Republikës së Kosovës Nr. 06/L-074.

Të pandehurit që nga data 22 Prill 2025, me vendim të Prokurorit të Shtetit gjenden nën masën e ndalimit 48 orësh për veprën penale “Vrasja e rëndë”.