Policia e Kosovës, respektivisht Sektori i Hetimeve nga Departamenti për Kufi, më 22.02.2024, ka arrestuar një person të dyshuar i cili është zënë në bjeshkët e fshatit Vërmicë duke bartur sasi të dyshuar të substancave narkotike.
I dyshuari ka qenë bashkë me një tjetër person të cilin zyrtarët policorë nuk kanë arritur ta kapin.
Sipas njoftimit të Policisë personat e dyshuar ishin vërejtur duke hyrë nga territori i Republikës së Shqipërisë në territorin e Republikës së Kosovës përmes rrugëve malore në mënyrë të paligjshme dhe në shpinë po bartnin ngarkesa të dyshuara.
Pas hyrjes në zonën e Republikës së Kosovës, të dyshuarit janë urdhëruar nga zyrtarët policor që të ndalen, mirëpo të njëjtit kanë lëshuar ngarkesat që bartnin dhe kanë filluar që të ikin. Njëri nga ta është ndaluar nga ana e zyrtarëve policorë.
Në dy çantat e kapura janë gjetur 11 paketime me gjithsej 33.800 kg substancë e dyshuar narkotike e llojit marihuanë.
Lidhur me rastin është konsultuar prokurori kompetent dhe rasti i kompletuar së bashku me substancën e dyshuar i dorëzohet Drejtorisë per Hetimin e Trafikimit me Narkotik Prizren për trajtim të mëtutjeshëm.
Qeveria e Kosovës ka vendosur t’i rrisë për 20 % pensionet duke filluar nga ky muaj.
Kjo u bë e ditur në konferencën për media të kryeministrit Albin Kurti me ministrin e financave Hekuran Murati.
Pensionet që do të rriten nga tetori janë: pensioni bazik i moshës, pensioni kontribut pagues i plotë dhe parcial, pensioni i aftësisë së kufizuar për fëmijë dhe për të rritur, pensioni për personat e verbër, për personat paraplegjikë dhe tetraplegjikë, familjar, invalidor i punës dhe pensioni i parakohshëm për punëtorët e Trepçës.
Me këtë rritje, nga tetori pensioni bazik i moshës do jetë 120 euro, pensioni kontributpagues për kategorinë e parë do rritet në 218 euro, për kategorinë e dytë 237 euro, për të tretë 256 euro dhe për të katërtën 318 euro.
Ndërkohë, nga muaji janar 2025 për 20% do të rriten edhe pensionet e përcaktuara me ligjin për kategoritë e luftës, ku përfshihen familjet e dëshmorëve, invalidëve, veteranëve, pjesëtarëve të ish-Ushtrisë Çlirimtare Kosovës, viktimave të dhunës seksuale të luftës, viktimave civile dhe familjarëve të tyre.
Për më shumë, tek kategoritë për familjet e dëshmorëve të UÇK-së dhe të të zhdukurve të UÇK-së që kanë më shumë se një dëshmor ose të zhdukur, do të ndryshohet edhe formula e pensionit, duke e rritur atë për 50% të pensionit bazë për çdo dëshmorë apo të zhdukur tjetër që ka familja.
Në një postim në Facebook, Ministri i Financave dhe Transfereve, Hekuran Murati, ka publikuar skemën e këtyre kategorive si do të bëhet pas rritjes së fundit.
Agjencia e Ushqimit dhe Veterinarisë (AUV) ka njoftuar për asgjësimin e 19-të gjedheve në fshatrat Gushicë dhe Verban të Komunës së Vitisë pasi u konstatua infektimi i tyre me tuberkuloz.
Sipas AUV-së, menjëherë pas konstatimit të infeksionit, është ndaluar lëvizja e kafshëve nga këto ferma, në përputhje me Ligjin e Veterinarisë dhe rregulloret në fuqi. Me krijimin e kushteve teknike dhe logjistike, asgjësimi i kafshëve është realizuar nën mbikëqyrjen e inspektorëve veterinarë në një vend të përcaktuar nga komuna, në kodrinën Bagdad, e destinuar për groposje të kafshëve.
Pronaret e fermave janë urdhëruar që të kryejnë pastrimin dhe dezinfektimin e fermave dhe është ndaluar popullimi i tyre për një periudhë gjashtëmujore.
Përmes një kompanie të kontraktuar, Agjencia e Ushqimit dhe Veterinarisë ka siguruar asgjësimin gjedheve si dhe dezinfektimin e ambienteve ku qëndronin kafshët e infektuara derisa fermerët do të kompensohen për humbjet e pësuara.
Deputetët e Kuvendit të Kosovës, Eman Rrahmani dhe Visar Korenica janë larguar nga Lëvizja Vetëvendosje, për t’iu bashkuar koalicionit të Aleancës Kosova e Re dhe Partisë së Drejtësisë.
Kjo u bë e ditur në konferencën për media, gjatë së cilës deputeti Rrahmani tha se bashkimi në, siç e quajti “Listën për Familjen”, po bëhet për shkak të projektligjeve, përkatësisht Kodit Civil dhe atij për Fertilizim të Asistuar, që kanë ardhur në kuvend nga Lëvizja Vetëvendosje, e që sipas tij, e cenojnë familjen tradicionale shqiptare.
Ai tha se kauza për familje është kauzë mbipartiake prandaj ka ardhur koha, siç u shpreh “për një angazhim politik më ndryshe”, duke shtuar se pjesë e këtij projekti do të jenë personalitete që e kanë dëshmuar veten dhe kanë një tregim suksesi në jetën e tyre.
Sa i përket angazhimit të mëtutjeshëm në kuvend, Rrahmani tha se si çdo herë do ta mbështesin secilën iniciativë, që sipas tyre, është e dobishme dhe do ta kundërshtojnë secilën që e konsiderojnë si të dëmshme.