Garat në lëndën e gjuhës angleze të filluara një muaj më parë, ku nxënësve u jepet mundësia t’i shprehin njohuritë e tyre në këtë lëndë, kanë hyrë në javën e pestë. Kjo garë me karakter eliminues, nga 257 garues sa kishte në fillim, tani ka vetëm 110 të tillë.
Anëtari i shoqatës së mësimdhënësve të gjuhës angleze Granit Demaj, tha se nga gara e zhvilluar sot do të eliminohen edhe 30 garues, për të vazhduar më pas me 80 konkurrentë të cilët do t’i vazhdojnë garat në mars të vitit të ardhshëm.
“Kanë mbetur 110 nxënës, javën tjetër kanë me mbet diku 80 nxënës, pastaj fillon sezona e dytë, pasi e kemi një pushim 3 mujor pastaj fillojmë në shkurt apo mars të vitit të ardhshëm fillojmë me pjesën e dytë të garës, ku mbeten 5 javë tjera edhe në fund mbeten 40 që shkojnë në vizitë në Tiranë dhe në fund mbesin 10, pastaj 5 dhe 5 të fundit marrin shpërblime, tre paguhen me mjete financiare”, tha Demaj.
Demaj konsideron se gara të tilla duhet të organizohen edhe nëpër komuna të tjera të Kosovës.
“Kjo garë është unike në komunën e Ferizajt, po e vërejmë nga emocionet e nxënësve të cilët rrinë gjatë tërë javës se a janë pjesë e garës ende apo jo, është garë interesante, po ashtu disa e kam vërejtur që kanë filluar të shprehen mes vete anglisht, po ashtu kanë mësuar fjalë të reja, është një garë që ia vlenë të mbahet jo vetëm në Ferizaj, por të shpërndahet edhe në komuna të tjera”,tha Demaj.
Kurse, nxënësit pjesëmarrës në këto gara, thanë se ato po u ndihmojnë edhe në procesin e rregullt mësimor.
“Përveç që është një garë që secili nga ne i testojmë njohuritë tona mbi anglishtën, por edhe çdo javë kur kalojmë në rundin tjetër është emocionuese, në përgjithësi është garë shumë interesante”, tha Arlind Hyseni, nxënës i shkollës “Jeronim de Rada”.
“Kam qenë edhe vitin e kaluar në këtë garë, është garë shumë e mirë, më ka pëlqy shumë, është interesante, mësojmë fjalë të reja nga dokumentarët që prezantohen, shpresoj që të jem të paktën në dhjetëshen e parë”, tha Erisa Çerkini, nxënëse në shkollën “Gjon Serreçi”.
Finalja e kësaj gare do të mbahet më më 20 prill të vitit të ardhshëm, me 5 finalistë, ku vendi i parë do të shpërblehet me 300 euro, vendi i dytë me 150 euro dhe vendi i tretë me 50 euro.
