Presidenti i Shqipërisë, Bajram Begaj, është takuar me kryetarin e Aleancës për Ardhmërinë e Kosovës, Ramush Haradinaj.
Pas takimit, Haradinaj ka thënë se bashkë me Begajn, kanë diskutuar tema të ndryshme.
Ai ka thënë se ndër të tjera kanë folur edhe për një pakt të përbashkët në mbrojtje dhe për çështje të sigurisë.
“Po ashtu kërkuam që shqiptarët kudo që janë të pajisen me shtetësi të Kosovës. Nga Shqipëria kërkojmë që të ndihmojë në arritjen e një marrëveshje me Serbinë, për njohje reciproke”, ka thënë ai, përcjell Koha.
Duke folur për dialogun, Haradinaj ka thënë se NATO e prirë nga Amerika nuk e lejon destabilizimin e Ballkanit.
Ai ka thënë se ka retorikë false nga ana e kryeministrit të Kosovës, Albin Kurti dhe presidentit të Serbisë, Aleksandar Vuçiq.
“Halli është me e mbulu marren me një marrëveshje për mossulmim nga kryeministri Kurti”, ka thënë ai.
Derisa ka komentuar situatën me energji elektrike, ai ka thënë se i ka paraparë rreziqet, duke shtuar se gjithashtu ka paraparë “katastrofë në këtë qeveri”.
“Është një dështim i qeverisë. Çështja e reduktimeve shihet që është menaxhimi i keq i kësaj qeverie”, ka thënë ai.
Begaj po qëndron në Kosovë nga e hëna, në vizitën e tij të parë zyrtare pas marrjes së detyrës së presidentit.
Ai është pritur me nderime shtetërore nga presidentja e Kosovës, Vjosa Osmani, me të cilën ka zhvilluar edhe takim.
Përveç Osmanit, Begaj ka takuar edhe kreun e ekzekutivit, Albin Kurti.
Gjatë qëndrimit në ditën e parë në Prishtinë, presidenti i Shqipërisë ka deklaruar se të dy vendet ndajnë aspiratat e njëjta drejt rrugës evropiane.
Ai ka thënë se Shqipëria e mbështet Kosovën drejt Bashkimit Evropian dhe NATO-s, ndërsa ka theksuar se do të jetë zëri i Kosovës aty ku i jepet mundësia.
Gjatë së hënës, presidenti i Shqipërisë ka bërë homazhe pranë varrit të ish-presidentit, Ibrahim Rugova si dhe familjes Jashari në Prekaz.
