Ferizaj

Në 22 vjetorin e rënies përkujtohen Ahmet Kaçiku dhe Vezir Jashari

Published

4 years ago

19 January, 2021

Në 22 vjetorin e rënies në altarin e lirisë, Ahmet Kaçiku dhe Vezir Jashari u nderuan me homazhe nga qytetarë dhe përfaqësues të institucioneve të Ferizajt.

Në nderim të jetës dhe veprës së tyre, udhëheqës të institucioneve komunale, të shoqatave të dala nga lufta, familjarë dhe bashkëluftëtarë bënë homazhe tek varrezat e Dëshmorëve të Ushtrisë Çlirimtare të Kosovës në Ferizaj, në vendin ku prehen këta dy dëshmorë, të rënë heroikisht në Reçak të Shtimes në betejë me forcat serbe.

“Ahmet Kaçiku ka një rol të jashtëzakonshëm në zbardhjen e masakrës së Reçakut dhe jam dëshmitar i kësaj pune që me sakrificën e tij dhe të ushtarëve të tjerë kemi arritur që brenda 15 janarit ta marrim në dorë fshatin Reçak dhe t’i ruajmë gjurmët për të parë të vërtetën që më 16 janar është parë jo vetëm nga mediat ndërkombëtare, por edhe nga përfaqësuesi kryesor i Kombeve të Bashkuara William Walker”, tha Imri Ilazi.

“Kjo ditë na përkujton atë që sot e gëzojmë, lirinë e shenjtë, kjo ditë ngjalli edhe emocione ndërkombëtare në mbështetje të UÇK-së ku bashkërisht bëmë luftë deri në lirinë e Kosovës, kjo ditë na përkujton neve luftëtarëve që të jemi gjithmonë në rrugë të drejtë dhe të jemi gjithmonë në atë vijë të tyre”, tha Luan Jahiri.

Ndërsa, familjarët e dëshmorëve thanë se shteti ynë ende nuk i ka arritur objektivat që kishin të rënët për liri.

“Për ne si familjarë të dëshmorëve kjo datë është shumë e madhe pasi është një datë e një komandanti që ka dhënë jetën për liri, por më e rëndë për ne është se pas 22 vjetësh objektivat nuk janë arritë, liri kemi, por një liri që nuk na kënaq, sot kriminelët udhëheqin shtetin e luftëtarët tanë gjenden në Hagë, për neve kjo është shumë e rëndë“, tha Tefik Ademi.

Me 19 janar, pas masakrës së Reçakut, Ahmet Kaçiku bie heroikisht në betejën e njohur si beteja e kufomave, në të cilën për tri ditë rresht ai së bashku me bashkëluftëtarët e tij i kishte ndalur forca serbe në tentimin e tyre për t’i fshehur gjurmët e një krimi monstruoz ndaj popullatës shqiptare të këtij fshati.

Ferizaj

Mbledhja komemorative për gazetarin Sylejman Shaqiri mbahet sot nga ora 14:00 në teatrin “Adriana” në Ferizaj

Published

11 hours ago

19 April, 2025

webmaster

Lajmi u bë i njohur nga familjarët përmes rrjeteve sociale.

Shaqiri ka qenë një figurë e rëndësishme në gazetarinë kosovare për dekada me radhë. Karrierën e tij e nisi në fillim të viteve ’80 në Radio Ferizaj, ku ushtroi detyrën e kryeredaktorit dhe drejtorit.

Më pas, ai vazhdoi punën në Radio Televizionin e Prishtinës (RTP) si gazetar dhe redaktor përgjegjës.

Pas mbylljes së dhunshme të RTP-së në vitet ’90, Shaqiri dha kontribut të rëndësishëm në informimin e popullatës në Kosovë përmes valëve të radio Zagrebit dhe Radio Tiranës.

Pas përfundimit të luftës në Kosovë, Shaqiri vazhdoi me angazhim në gazetari, fillimisht në Radio Ferizaj dhe Radio Tema, e më pas mori pozita udhëheqëse në Radio Televizionin e Kosovës (RTK), përfshirë atë të drejtorit të përgjithshëm.

Shaqiri lë pas një trashëgimi të rëndësishme profesionale dhe një kontribut të pazëvendësueshëm për gazetarinë në vend.

Në nderim jetës dhe veprës së tij, familja e të ndjerit në bashkëpunim me Komunën e Ferizajt dhe Klubin e Gazetarëve “Haki Braha” në Ferizaj, do të mbajnë sot (19.04.2025) mbledhje komemorative me fillim nga 14:00 në Teatrin “Adriana” në Ferizaj.

Ferizaj

Është ndarë nga jeta mjekja e mirënjohur ferizajase Dr. Rushe Ramadani Rushiti

Published

1 week ago

11 April, 2025

Redaksia

Është ndarë nga jeta mjekja e mirënjohur ferizajase Dr. Rushe Ramadani Rushiti.

Lajmi u bë i ditur nga familjarët dhe kolegët në rrjetin social Facebook.

Dr.Rrushja kreu studimet në Fakultetin e Mjekësisë në Universitetin e Prishtinës kurse specializimin për Obstetrikë-Gjinekologji e kreu në Tiranë.

Punën si mjeke e përgjithshme ajo e filloi në vitin 1984 në maternitetin e Shtëpisë së Shëndetit në Ferizaj kurse pas largimit nga puna nga organet e dhunshme serbe vazhdoi punën në maternitetin e improvizuar “Nëna Terezë” në Prishtinë.

Pas çlirimit, Dr.Rrushja vazhdoi punën në Spitalin e Ferizajt ku organizoi funksionalizimin e Repartit të Gjinekologjisë kurse vitet e fundit ishte angazhuar në poliklinën “Zeka” në Ferizaj.

Mbledhja komemorative për Dr. Rushe Ramadani Rushiti do të mbahet të shtunën (12 prill 2025), me fillim në ora 11:00 në Teatrin “Adriana” në Ferizaj.

Ferizaj

Të shtunën disa fshatra të regjionit të Ferizajt do të mbeten pa rrymë

Published

2 weeks ago

04 April, 2025

webmaster

Të shtunën (05.04.2025) disa fshatra të regjionit të Ferizajt do të përballen me ndërprerje të planifikuar të energjisë elektrike, si pjesë e punimeve për mirëmbajtjen e rrjetit.

Sipas njoftimit nga KEDS, ndërprerja do të zgjasë nga ora 09:30 deri në 14:30 dhe do të prekë fshatrat Greme, Gaçkë, Burrnik, Izhancë, Kashtanjevë, Bajincë, Semajë, Prushaj dhe Sllatinë si dhe disa biznese private në këto zona.

Ndërhyrja teknike përfshin ndërrimin e shtyllave dhe izolatorëve të dëmtuar, shtrëngimin e përçuesve dhe pastrimin e trasesë për të siguruar funksionimin e qëndrueshëm të rrjetit elektrik.