Për një seancë gjyqësore që e pati dy ditë më parë, bashkatdhetaria Mevlide Ilazi erdhi nga Zvicra, mirëpo një e tillë nuk u mbajt për shkak të grevës së administratës që po mbahet në këtë institucion. Për këtë zonja Ilazi dhe shumë qytetarë të tjerë po ankohen për punët që s’po mund t’i kryejnë jo për fajin e tyre.
“Kur erdhëm s’ka gjykim, shkova në pushim më thanë hajde me 6 kur u ktheva prapë s’ka se qenka greva. Më thirrën në telefon gjysmë ore përpara, ju thash kjo nuk është e drejtë, nuk më keni lajmëruar më parë unë erdha nga larg për ta respektu datën e gjykimit, gjykatën e shtetin por kot. Më vjen keq që po shprehem kështu, por ndoshta po dihet për kënd po flas, është marre me ta pa në konak e lëre ma në krye të shtetit. Neve janë duke na maltretuar”, tha Ilazi.
Ndërkaq, në Gjykatën Themelore të Ferizajt janë të vetëdijshëm që ankesat e qytetarëve çdo ditë e më shumë do të rriten, por sipas tyre, greva do të vazhdoj deri në përmbushjen e kërkesave që kanë për rritje të pagave.
“Po kemi raste që ankohen, por kemi edhe të tilla që janë shumë urgjente dhe po i kryejmë, për shembull sot e kemi pasur një mërgimtar të cilit i është dashtë urgjent një vërtetim për nën hetime dhe zyrtarët tanë ia kanë kryer këtë shërbim. Ndërsa rastet e gjykimeve dhe dokumenteve tjera që kërkohen normalisht nuk mundmi me i kry për shkak që zyrtarët e gjykatës janë në grevë”, tha zëdhënësja e këshillit grevist Arbelinda Tahiri .
Tahiri ka njoftuar se rastet që kanë të bëjnë me gjykime emergjente janë duke vazhduar, pavarësisht grevës që po zhvillohet.
“Çështjet që janë më urgjente do të thotë paraburgimet, masat e fshehta, vazhdimet e paraburgimeve ato duhet dhe janë duke u kryer”, tha Tahiri.
E derisa zyrtarët e gjykatës sot sikurse edhe ditëve të tjera po qëndrojnë në salla të gjykimeve duke e respektuar grevën që kanë nisur, në anën tjetër mërgimtarja nga Zvicra Mevlide Ilazi ka një porosi për udhëheqësit e vendit.
“Ju bëjë apel atyre qeveritarëve që mos t’i shikojnë vetëm hallet e tyre, sepse edhe ne kemi halle sa që as shleperat s’munden t’i qojnë. Thotë një fjalë popullore që druvari me gjoks nuk shtyhet, ndërsa këta e kanë bë gardh për vete, e për neve kanë vendos mur të betonit, por mos të harrojnë se populli s’është budallë, sepse populli është kamera më e madhe që i vëzhgon çdo ditë. Ju lutem punoni për këtë shtet e për këtë popull e mos lejoni që populli ta humb durimin”, u shpreh Ilazi.
Ndryshe, kërkesa e grevistëve të gjykatave dhe prokurorive në Kosovë është rritja e pagave për 100%, për rreth 2 mijë punëtorët e administratës dhe rregullimi i statusit të tyre. Kjo kërkesë e tyre vjen pas vendimit për rritjen e pagave të kabinetit qeveritar.
