Javën që shkoi 24 vjeçarja Valentina Ibrahimi nga Ferizaj u diagnostikua me leukemi akute.
Motra e saj Rigona Ibrahimi, tregon se Valentinës pa pritur iu shfaqën disa probleme shëndetësore për të cilat në fillim mjekët dyshuan që ishte infektuar me Covid-19, por fatkeqësisht pas analizave të bëra ajo u diagnostikua me leukemi akute.
“Si fillim mjekët në Kosovë kanë dyshuar për Covid dhe ka marrë terapi anti-Covid derisa ka fillu me iu përkeqësu gjendja dhe kur ka shku në Maqedoni e kanë parë që nuk është me virus dhe është kthyer në Prishtinë ku është pranuar në Klinikën Hematologjike ku aty i kanë bërë analiza më të thella dhe është vërtetuar se është me leukemi akute“, tha Rigona Ibrahimi.
Meqë shërimi i kësaj sëmundjeje nuk është i mundur në Kosovë, Valentina është dërguar në Turqi, por që trajtimi i saj kap një kosoto shumë të lartë të cilën familja nuk mund ta përballoj, prandaj ata po kërkojnë ndihmë nga qytetarët vullnetmirë.
“Të martën motra është pranuar në spitalin e Prishtinës, ka qëndruar vetëm dy ditë dhe pasi i është përkeqësuar gjendja jemi detyruar që me e nisë për në Turqi shkaku që ajo i ka humbur ndjenjat. Ajo nuk e di që është me leukemi, ne kemi bërë apel me na ndihmu, pasi nuk mundemi me përballu shumën që e ka kërkuar spitali dhe po kërkojmë që sado pak me na ndihmu qytetarët. Për momentin motrën e kemi në komë”, theksoi Ibrahimi.
Kostoja e trajtimit të 24 vjeçares në Turqi kushton rreth 200 mijë euro, ku 30 mijë euro janë ndarë nga Ministria e Shëndetësisë, e për të siguruar pjesën tjetër familja Ibrahimi po kërkon ndihmën e qytetarëve të cilët mund të kontribuojnë përmes xhirollogarisë bankare me numër XK051504001007448572.
