Kosovë

Hamza dhe Haradinaj përjashtojnë koalicionin me Kurtin

Published

2 weeks ago

10 February, 2025

Dy nga kandidatët për kryeministër në zgjedhjet parlamentare 2025, Bedri Hamza nga PDK dhe Ramush Haradinaj nga koalicioni AAK-Nisma, deklaruan se nuk do të hyjnë në koalicion me fituesin e zgjedhjeve Lëvizjen Vetëvendosje të Albin Kurtit. Ata preferojnë të krijojnë një qeveri mes subjekteve politike që deri tani ishin në opozitë dhe që bazuar në rezultatet preliminare, së bashku me partitë minoritare, mund të kalojnë numrin e 61 deputetëve të nevojshëm për shumicë parlamentare.

Në konferencën për media, Bedri Hamza tha se PDK-ja s’do të bëjë koalicion me Lëvizjen Vetëvendosje, pasi siç u shpreh ai, shumica e qytetarëve shqiptarë nuk duan që e njëjta qeveri të vazhdojë.

Në këto zgjedhje janë fuqizuar partitë opozitare, tha Hamza duke shtuar se Lëvizja Vetëvendosje gjatë fushatës ka nxitur urrejtje dhe ka ofenduar kundërshtarët.

Edhe kreu i AAK-së, Ramush Haradinaj ka përjashtuar një koalicion të mundshëm me kryeministrin në largim, Albin Kurti.

Ai në konferencën për media pranoi faktin se është i pakënaqur me rezultatin e zgjedhjeve, por shprehu gatishmërinë të bashkëpunojë me partitë opozitare për ta krijuar shumicën.

“Me kënaqësi do të bashkëpunonim me subjektet politike opozitare shqiptare për të krijuar shumicën edhe që është e mundshme realisht nëse kemi këtë gatishmëri. Jemi të gatshëm për këtë. Pa asnjë kusht. Nuk kërkojmë asnjë kusht që pengon të ecim përpara”, ka thënë Haradinaj.

Kurse kandidati i LDK-së për kryeministër, Lumir Abdixhiku deklaroi se fillimisht pret numërimin përfundimtar të votave dhe më pas LDK do të ofrojë qëndrimet e veta politike.

Kosovë

Gjykata Speciale liron me kusht Ismet Bahtijarin dhe Sabit Jonuzin

Published

16 mins ago

21 February, 2025

Redaksia

Ismet Bahtijari dhe Sabit Januzi janë liruar me kusht nga vuajtja e dënimit në Hagë, me urdhër të kryetares së Dhomave të Specializuara të Kosovës, Ekaterina Trendafilova.

Në njoftim bëhet e ditur se Bahtijari dhe Januzi, të dënuar me nga dy vjet burgim për pengim të drejtësisë dhe frikësim të dëshmitarëve do të lirohen me kusht më 21 shkurt 2025 pasi ata kanë plotësuar kriterin për modifikim të dënimit, meqë i kanë vuajtur dy të tretat e dënimit me burgim.

Gjykata Speciale më 4 shkurt pati miratuar marrëveshjen për pranimin e fajësisë, e cila ishte arritur mes Haxhi Shalës, Ismet Bahtijarit dhe Sabit Januzit me Zyrën e Prokurorit të Specializuar.

Bazuar në të, Shala u dënua me tre vjet burgim kurse Bahtijari dhe Januzi me nga dy vjet burgim.

Në dënim u është llogaritur edhe koha e qëndrimit në paraburgim.

Të dy janë arrestuar më 5 tetor 2023.

Kosovë

KQZ publikon rezultatet preliminare pas numërimit të 100% të vendvotimeve

Published

1 day ago

20 February, 2025

Redaksia

Komisioni Qendror i Zgjedhjeve i ka publikuar të dhënat e rezultateve preliminare nga numërimi i 100% të votave për partitë politike. Rezultatet preliminare nuk përfshijnë votat me kusht, votat e personave me nevoja të veçanta dhe votat jashtë Kosovës.

Ndërkohë procesi i numërimit të votave të kandidatëve për deputetë është drejt përfundimit pasi deri tani janë numëruar 92.73% e vendvotimeve. Numërimi ka përfunduar në 31 komuna ndërsa ende po vazhdon në Leposaviq, Pejë, Podujevë, Prishtinë, Prizren, Ferizaj dhe Zveçan.

Pas përfundimit të numërimit të këtyre votave, do të nisë edhe numërimi i votave nga diaspora, atyre me kusht dhe të personave me nevoja të veçanta.

Kosovë

Ministrit Damka i caktohet masa e arrestit shtëpiak

Published

1 week ago

11 February, 2025

Redaksia

Gjykata Themelore në Prizren ka caktuar masën e arrestit shtëpiak në afat prej një muaji ndaj ministrit të Zhvillimit Rajonal, Fikrim Damka, i arrestuar më 9 shkurt, nën dyshimin për veprat penale sulm dhe kanosje.

Masë e njëjtë i është caktuar edhe të pandehurit tjetër që dyshohet se është përfshirë në këtë vepër.

“Masa e arrestit shtëpiak është caktuar në kohëzgjatje prej një (1) muaji, e cila do të llogaritet prej kohës së arrestimit 09.02.2025 dhe mund të zgjasë deri më datën 09.03.2025.

Të pandehurit nuk guxojnë që të largohen nga vendbanimi pa lejen e Gjykatës, si dhe iu ndalohet të kontaktojnë me personat me të cilët ata nuk jetojnë apo nuk janë të varur nga të pandehurit”, thuhet në njoftimin e Gjykatës.

Kryetar i Partisë Demokratike të Turqve të Kosovës Fikrim Damka, dyshohet se ka sulmuar dy persona, përfshirë Arda Malokun, nga Partia Inovative e Lëvizjes Turke.

Sipas Prokurorisë, sulmi është bërë për shkak të mosmarrëveshjeve të mëhershme politike mes palëve.