Një bjeshkatar nga Bullgaria, humbi jetën në afërsi të “Majës së Jezercës” në Shqipëri.

Viktima u gjet pa shenja jete nga ekipi i kërkim-shpëtimit të policisë së Shqipërisë, një ditë pas raportimit se ai dhe një bashkëkombës i tij, kishin mbetur të bllokuar për shkak të terrenit të vështirë.

Dyshohet se gjatë ecjes bjeshkatare, 32 vjeçari kishte rrëshqitur nga një lartësi dhe si pasojë e ka humbur jetën.

“Nga ekipi i kërkim-shpëtimit është bërë e mundur nxjerrja e trupit të pajetë, i cili do të transportohet me helikopter, drejt morgut. Turisti tjetër është larguar drejt Malit të Zi, në gjendje të mirë shëndetësore”, thuhet në njoftimin e policisë së Shqipërisë.

Ky është rasti i dytë i vdekjes tragjike në këtë shteg brenda pak muajve, pasi më 30 mars, këtu humbi jetën edhe një bjeshkatare 43 vjeçare nga Kroacia.

Ndryshe, “Maja e Jezercës” është maja më e lartë e Bjeshkëve të Nemuna, e dyta më e larta në Shqipëri, me lartësi 2,694 metra mbi nivelin e detit. Nga bjeshkatarët alpinistë, shtegu drejt kësaj maje konsiderohet me rrezikshmëri të lartë, sidomos gjatë sezonit të dimrit.

Në zgjedhjet lokale që u mbajtën këtë të diele në Luginën e Preshevës, Ardita Sinani nga Partia për Veprim Demokratik, shpalli fitoren në Preshevë, ndërkaq Arbër Pajaziti nga Fronti për Ndryshim, ka shpallur fitoren në Bujanoc.

Në postimin e parë pas zgjedhjeve, Ardita  Sinani shkroi se “Kjo fitore përpos që është rritje për subjektin tonë politik, krahasim me numrin në rënie të votuesve, për neve është shumëfish më e madh e ne kemi dominuar në të gjitha bastionet e jemi dominues në bastionet e APN-së”.

Edhe Arbër Pajaziti në një postim në facebook theksoi rëndësinë e këtyre zgjedhjeve për qytetarët e Buajnocit.

“Bashkëkombës të dashur, me këtë fitore na obliguat që të krijojmë një shumicë të re qeverisëse në Bujanoc. Atë edhe do ta bëjmë. Shumë shpejt. S’kemi kohë për të humbur, sepse na presin shumë punë. Vota e juaj është një amanet për të bërë një Bujanoc ndryshe. Gjithmonë në shërbimin tuaj!”, ka shkruar Pajaziti.

Në një përleshje me armë zjarri që ndodhi mbrëmë në Shkup, në lokacionin e njohur si Rruga e Plastikave mbeti i vrarë këngëtari shqiptar, Amar Ismani.

Në incident janë përfshirë disa persona ndërsa janë plagosur edhe tre të tjerë.

Lajmin për vdekjen e artistit e bëri të ditur edhe vëllai i tij, Edin Ismani në rrejtin social Facebook.