Gjykata Themelore në Prishtinë ka lëshuar fletarrestim ndaj Milan Radoiçiqit dhe 19 personave të tjerë për veprën penale “Krime lufte kundër popullatës civile”.

Ata dyshohen se në periudhën kohore, nga data 7 maj e deri më datë 10 maj te vitit 1999, në vendin e quajtur “Ura e Taliqit” në Gjakovë kanë vrarë rreth 106 civilë shqiptarë, trupat e të cilëve më pas u gjetën në një varrezë masive në Batajnice të Serbisë.

Ndryshe, Milan Radoiçiqi akuzohet edhe për sulmin terrorist në Banjskë të Zveçanit, sulm për të cilin edhe e ka pranuar përgjegjësinë. Për këtë rast, Gjykata ka lëshuar letërreshtime ndërkombëtar për sigurimin e prezencës së Radoiçiqit dhe të pandehurve tjerë në procedurë.

Prokuroria Speciale e Republikës së Kosovës (PSRK) më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit.

Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, ku si rezultat i dhunës së përdorur ka mbetur i vdekur zyrtari policor Afrim Bunjaku.  

Në ceremoninë e varrimit të Papa Françeskut, e cila filloi paraditen sotme në sheshin e Shën Pjetrit  në  Vatikan,  në mesin e liderëve dhe përfaqësuesve nga mbi 150 vende të botës po marrin pjesë edhe liderë institucional e fetar të Kosovës dhe Shqipërisë.

Presidentja Vjosa Osmani bashkë me presidentin e Shqipërisë Bajram Begaj dhe udhëheqës të komuniteteve fetare kanë kryer homazhe në Vatikan një ditë më parë kurse sot, në ceremoninë e varrimit po merr pjesë edhe kryeministri në detyrë i Kosovës, Albin Kurti.

“Kryeministri në detyrë i Republikës së Kosovës, Albin Kurti ka udhëtuar për në kryeqendrën e Italisë, Romë, për të marrë pjesë në ceremoninë e varrimit të Shenjtërisë së Tij, Papa Françeskut”, thuhet në njoftimin e Kryeministrisë.

Papa Françesku vdiq të hënën e Pashkëve, më 21 prill , në moshën 88-vjeçare, pas një sulmi në tru.

Italia ka angazhuar mbi  2.500 policë dhe 1.500 ushtarë për ceremoninë e funeralit, pasi në Sheshin e Shën Pjetrit pritet të jenë rreth 200 mijë njerëz dhe deri në 300 mijë të tjerë përgjatë rrugës nga Vatikani deri në Bazilikën e Shën Marisë së Madhe, ku do të varroset Papa Françesku.

Astronomja Pranvera Hyseni ka shënuar një arritje të jashtëzakonshme në nivelin ndërkombëtar, duke fituar çmimin “Dwornik” për prezantimin më të mirë oral nga një student në Konferencën Ndërkombëtare të Shkencave Planetare dhe Hënore 2025, të mbajtur në Houston të SHBA-ve.

Në mesin e mbi 2 mijë pjesëmarrësve nga mbarë bota, punimi i Hysenit është vlerësuar si më i dalluari nga Divizioni i Gjeologjisë Planetare i Shoqatës Gjeologjike të Amerikës (GSA) – një ndër çmimet më prestigjioze për studentët në këtë fushë.

Projekti i saj shkencor është fokusuar në shpërndarjen e lëndës organike në familjet e asteroideve, duke u mbështetur në të dhëna që ajo i mblodhi përmes teleskopit NASA Infrared Telescope Facility, të vendosur në ishujt Hauai.

Në një postim të shpërndarë në Facebook, Pranvera u shprehu mirënjohje të veçantë mentorëve të saj, Dr. Myriam Telus dhe Dr. Andrew Rivkin, për mbështetjen dhe besimin në punën e saj shkencore.

Ky vlerësim përfaqëson jo vetëm një moment historik personal për Hysenin, por edhe një dëshmi të fuqishme për potencialin e të rinjve nga Kosova në rangun e shkencës botërore

Pranvera Hyseni është kandidate për PhD e Studimeve Planetare pranë Universitetit Santa Cruz të Kalifornisë.

Ajo ishte nismëtare e OJQ “Astronomy Outreach of Kosova”, ndërsa me kontributin e saj u mundësua edhe ndërtimi i Observatorit dhe Planetariumit të parë në Kosovë, i vendosur në Rashincë të Shtimes.