Ferizaj
Largoi kontenjerët, “Pastërtia” me zgjidhje “kreative” për mbeturinat në rrugën “Toni Blair”
Kompania Rajonale e Mbeturinave “Pastërtia”, të martën mori vendim që kontenjerët në rrugën “Toni Blair” në Ferizaj t’i largojë përkohësisht.
Për tërheqjen e mbeturinave në këtë rrugë, “Pastërtia” gjeti një zgjidhje kreative.
Kjo kompani vendosi që katër herë në ditë, të dërgojë në këtë rrugë një kamion i cili do të qëndrojë aty për 15 minuta dhe tu mundësojë banorëve të kësaj rruge dhe bizneseve që gjatë kësaj kohe të hudhin mbeturinat direkt në kamion.
Sipas njoftimit të “Pastërtisë”, ky vendim do të mbetet në fuqi deri në vendosjen e kontenjerëve statik në këtë rrugë.
Në orën 17:00, sot ekipi i TV TEMA doli në rrugën “Toni Blair” për të parë aktivitetin jo të zakonshëm të “Pastërtisë”.
Në kohën kur mbërriti kamioni i kësaj kompanie, ferizajasit e asaj ane u treguan të vëmendshëm dhe menjëherë dolën për të hedhur bërllokun në kamion.
Megjithatë disa ferizajas nuk ishin treguar të duruar për të hedhur mbeturinat drejt e në kamion por kishin krijuar një deponi në vendin ku kanë qenë kontenjerët më parë.
Pavarësisht se në njoftimin e “Pastërtisë” thuhej se qytetarët duhet të shkojnë e të hudhin bërllokun vet në kamion, punëtorët e larguan deponinë e krijuar.
Në njoftimin e vet, “Pastërtia” nuk tregon se kur mund të vendosen kontenjerët statik në këtë hapësirë dhe se sa do të zgjasë kjo zgjidhje “kreative”.
