Arbëri
I jepet lamtumira e fundit politologut Ramush Tahiri
Politologu, gazetari e analisti politik Ramush Tahiri ndërroi jetë të premten në mbrëmje.
Për të nderuar veprimtarinë e tij, sot në qytetin e Ferizajt u mbajt mbledhje komemorative.
Kryetari i Komunës së Ferizajt, Agim Aliu në këtë mbledhje tha se Tahiri ishte intelektual i papërsëritshëm.
“Miku im Ramush, kjo sallë është e heshtur dhe e mbushur me pikëllim për ty, shpejtë na e dhe lamtumirën, të kisha mik e gjithmonë të çmova si më të shtrejtin ferizajas” deklaroi Aliu.
Gazetari Nehat Islami thotë se argumenti ishte mbështetja e tij kur fliste për proceset politike.
“Ramushi nuk shkoi për studime në Zagreb që të bëhej sekretar diku. Ai shkoi të shkollohej për të bërë ndryshimet ndaj sistemit Komunist”, thotë Islami.
E akademiku Ali Aliu thotë se vdiq një njeri i mirë e që vendin e la më të varfër pa një njeri të mirë.
“E lehtë i qoftë toka e Kosovës që e deshi shumë”, deklaroi Aliu për Tahirin.
Ish ambasadori Avni Spahiu për Ramush Tahirin tha se sot është ditë pikëllimi për tërë Kosovën.
“Ramushi ishte personalitet me kontribut të madh intelektual, i cili e vuri veten në shërbim të kauzës kombëtare. Ishte veprimtar dhe kontribus shumë dimensional dhe nga më të shquarit”, tha Spahiu.
I biri i Ramush Tahirit, Kreshniku thotë se po ndihet krenar e fatlum pavarësisht dhimbjes për humbjen e prindit.
“Një ndër vetitë e tij ishte që të mos e përziejë jetën personale dhe atë profesionale, duke mos sjellë problemet e punës në shtëpi. Për mua dhe Valdrinin ishte baba, hati afër perfeksionit, kemi mësuar shumë nga ai por kanë mbetur edhe shumë gjëra që duhet t’i mësojmë”, deklaroi ai.
Varrimi i Tahirit bëhet në orën 14:00 në fshatin Dremjak të Ferizajt.
