Për 3 ditë më shumë se 4 mijë qytetarë të Ferizajt kanë dhënë nënshkrimet e tyre në peticionin që është organizuar nga Lëvizja Vetëvendosje, përmes së cilit ky subjekt politik po kërkon që vendi të shkoj në zgjedhje të parakohshme.
Sekretarja e Qendrës së Vetëvendosjes në Ferizaj Liridona Gashi, tha se duke e parë interesimin e qytetarëve për të nënshkruar këtë peticion kanë vendosur edhe dy tenda në Ferizaj, një në rrugën “Agim Matoshi” dhe tjetrën në rrugën “Vëllezërit Gërvalla”.
“Kemi filluar me marrjen e nënshkrimeve këtu në shesh, por për shkak të interesimit të qytetarëve për të nënshkruar nga sot do të shtojmë edhe dy pika të reja, njëra do të jetë tek rruga kah tregu, kurse tjetra tek Enti për Punë Sociale, por mundësitë janë të shtohen edhe pika të tjera pasi fluksi i qytetarëve për të nënshkruar është i jashtëzakonshëm. Deri tash numri i nënshkrimeve është 110 mijë, ndërsa në Ferizaj këto dy ditë kanë qenë 4 mijë nënshkrues dhe po presim që në ditët në vijim me hapjen e pikave të tjera numri i nënshkruesve do të jetë edhe më i madh”, tha Gashi.
Gashi tha se përmes këtij peticioni po vërtetohet se kërkesa për zgjedhje nuk është vetëm e aktivistëve të Lëvizjes Vetëvendosje, apo e votuesve të kësaj partie, por edhe e qytetarëve të cilët më parë kanë pasur pikëpamje të tjera politike.
“Ajo që po vërehet dukshëm është se qytetarët pa marrë parasysh partitë politike që i kanë përkrahur deri tani shihet se gjërat kanë ndryshuar dhe qytetarët janë të gatshëm të nënshkruajnë pasi vullneti i tyre është shkelur, faktikisht ajo që kanë vendosur më 6 tetor ka ndryshuar në mënyrë drastike me pazaret që janë bërë dhe kësisoj ata kanë vendosur që të kërkojnë të drejtën e tyre dhe të vendoset përmes sovranit se kush duhet të udhëheq”, tha Gashi.
Qytetarët të cilët po nënshkruanin peticionin për zgjedhje, thanë se e duan Albin Kurtin në krye të Qeverisë së Kosovës.
“E kanë vjedhur vendin dhe jemi për zgjedhje, u pa ndyshimi për 50 ditë edhe pse të tjerët nuk e pranojnë”, tha Selman Isufi, qytetar.
“Unë jetoj jashtë, tani jam në pension dhe po jetoj këtu më shumë, mendoj që Albin Kurti është ai i cili mund ta çoj vendin përpara”, tha Halit Berisha.
“Unë jam për Albin Kurtin se është më i miri dhe u pa puna që është më i miri”, tha një tjetër qytetar.
“Partia më e pakorruptuar, të ri, të shkolluar, këta të vjetrit duhet me shku, në zgjedhje duhet të shkojmë dhe populli të vendos”, tha një tjetër nënshkrues i peticionit të Vetëvendosjes.
Peticioni i Lëvizjes Vetëvendosje për zgjedhje të reja ka filluar që nga data 1 qershor, pas vendimit të Gjykatës Kushtetuese që i dha të drejtë dekretit të presidentit Thaçi, vendim ky i cili bëri që Avdullah Hoti të vie në krye të Qeverisë.
