Nga sot ka nisur faza e tretë e masave lehtësuese sa i përket pandemisë Covid-19.
Në ditën që u dedikohet fëmijëve, të vegjëlit sot u janë rikthyer kopshteve pas afër 3 muajsh të mbyllur në shtëpi.
Edhe pse në numër të vogël, në çerdhen publike “Ardhmëria Jonë” në Ferizaj, sot kishin shkuar fëmijë.
Drejtoresha e këtij institucioni, Azemine Aliu, tha se për hapjen e çerdheve janë lajmëruar shumë vonë, por se përgatitjet e duhura i kishin bërë më herët.

“Sot dita ka qenë me stres pasi informacionet i kemi marrë shumë vonë, edhe pse para disa ditëve çerdhja për nga ana e higjienës, dezinfektimit, pastërtisë e mjeteve higjienike isha e gatshme. Në udhëzues shkruan edhe për mbulojat e fëmijëve dhe ato janë të pastruara, të hekurosa, gjithçka ishte në rregull për nga ana e stafit, unë isha siguruar që i gjithë stafi janë mirë me shëndet, poashtu edhe nga ana e prindërve të fëmijëve kisha informacione se në të gjitha familjet e fëmjëve që janë në kopshtin tonë janë të gjithë në gjendje të mirë dhe nuk janë të prekur me Covid dhe kjo ma lehtësoi punën mua shumë”, tha Aliu.

Aliu thotë se do të kenë kujdes të shtuar për të zbatuar rekomandimet për mbrojtje nga koronavirusi dhe atë duke i inkorporuar në plan-programe.

“Do të bëjmë lojëra në hapësirë ku do të bëjmë rrethe dhe kështu do bëhet edhe lojë, por edhe distanca do të ruhet, dritaret kanë me u hap shumë shpesh dhe fëmijëve do t’ua sqarojmë pse po hapen dritaret, do t’iu tregojmë mos të bëjnë përqafime, por të përshëndeten në mënyrë tjetër, e shumë masa të tjera të cilat do t’i zbatojmë përmes lojërave”, tha Aliu.

Në Drejtorinë e Arsimit në Ferizaj thonë se javën e kaluar kanë bërë përgatitjet e nevojshme për hapjen e çerdheve publike.

“Në bazë të njoftimit që kemi marrë dje nga Ministria e Shëndetësisë përmes mediave dhe pak më vonë kemi marrë edhe një udhëzues nga Ministria e Arsimit lidhur me hapjen e çerdheve dhe përgatitjet e tyre dhe fatmirësisht komuna e Ferizajt ka bërë përgatitjen e nevojshme si dezinfektimin e tyre, pastrimin e tyre gjeneral javën që shkoi dhe ishim të gatshëm për hapjen e tyre. Ne kemi kontaktuar drejtoreshat e çerdheve dhe sot çerdhja publike ka filluar punën, ndërsa kopshti “Engjëlli” pritet të filloj nesër për shkak të disa ndërhyrjeve të tjera që kanë qenë duke u bërë, ndërsa për çerdhet private kemi informacione se disa kanë filluar dhe disa jo, por e rëndësishme është që çerdhet në Ferizaj janë të gatshme për t’i pritur fëmijët”,tha Llabjani.

Pas hapjes së çerdheve publike dhe atyre private, nga data 8 qershor deri më 19 qershor do të bëhet edhe kthimi i klasëve të nënta nëpër shkolla ku dhe është paraparë të organizohet testi i arritshmërisë i cili do të mbahet me 23 qershor, ndërsa nga data 15 qershor deri më 30 qershor do të bëhet kthimi i klasëve të dymbëdhjeta nëpër shkolla të cilat edhe do t’i nënshtrohen testit të maturës më 4 korrik.