Presidentja Vjosa Osmani i është përgjigjur letrës nga kryesuesi i seancës konstituive, Avni Dehari, i cili kërkoi sugjerime për situatën e paprecedentë të krijuar në Kuvend, kur të zgjedhurit për deputetë nuk miratuan raportin e Komisionit për verifikim të kuorumit dhe mandateve.

Në këtë letër, Osmani duke cituar Aktgjykimin Nr.KO72/20 të Gjykatës Kushtetuese thotë se “struktura e normave kushtetuese që ndërlidhen me themelimin e institucioneve shtetërore që burojnë nga vota e popullit, duhet të interpretohet në atë mënyrë që të jetësojnë e jo të bllokojnë themelimin dhe ushtrimin efektiv të funksioneve përkatëse.“

Duke përmendur edhe Aktgjykimin Nr. KO119/14, në të cilin Gjykata Kushtetuese ka obliguar të gjithë deputetët e Kuvendit që në pajtim me dispozitat kushtetuese dhe dispozitat e Rregullores së Kuvendit, ta gjejnë mënyrën për ta bërë Kuvendin funksional, presidentja Osmani fton Kryesuesin e seancës konstituive ta realizojë këtë seancë në përputhje me parimet kushtetuese, Rregulloren e Kuvendit dhe legjislacionin në fuqi.

Ndryshe, Rregullorja e Kuvendit përcakton që një seancë e re duhet të thirret brenda 48 orësh, që do të thotë se vazhdimi i kësaj seance duhet të mbahet më së voni deri të enjten, më 17.04.2025.

Presidenca ka konfirmuar pranimin e letrës nga kryesuesi i seancës konstituive, Avni Dehari, për të marrë interpretimin e presidentes për situatën e paprecedentë të krijuar në Kuvend, kur të zgjedhurit për deputetë nuk miratuan raportin e Komisionit për verifikim të kuorumit dhe mandateve.

Në këtë letër, Dehari kërkon nga presidentja Vjosa Osmani sugjerime për opsionet e mundshme përpara, pas bllokimit të kuvendit.

“E nderuara Shkelqësia juaj, Znj. Vjosa Osmani Sadriu, Presidente e Republikës së Kosovës,

Ju drejtohem në cilësinë e kryesuesit të seancës konstituive të Kuvendit të Republikes Kosovës për legjislaturën e IX-të. Në përputhje me Rregulloren e Kuvendit, rendi i ditës për seancën e djeshme konstituive ishte:

– Formimi i Komisionit të Përkohshëm për Verifikimin e Kuorumit dhe të Mandateve,– Betimi i deputetëve,-Zgjedhja e Kryetarit të Kuvendit,

– Zgjedhja e nënkryetarëve të Kuvendit.

Lidhur me pikën e parë, për njoftimin tuaj, Raporti i Komisionit për verifikimin e kuorumit dhe mandateve, u votua me shumicë të votave në Komision, mirëpo si asnjëherë më parë, ky Raport, nuk e mori mbështetjen e shumicës në Kuvendin Republikës së Kosovës. Rrjedhimisht, mandatet nuk u verifikuan dhe betimi i deputetëve nuk procedoi.

Në pamundësi të votimit të raportit për verifikimin e mandateve, në cilësinë e Kryesuesit e kam ndërprerë seancën konstituive.

Në këto rrethana, të një situate të paprecedent, unë ju drejtohem juve si Presidente e Republikës për sugjerime për opsionet e mundshme përpara”, thuhet në letrëne drejtuesit të seancës konstituive të Kuvendit të Kosovës, Avni Dehari, që iu dërgua presidentes Osmani.

Më herët Bekim Kupina, këshilltar për Media i presidentes Osmani, tha se letra ka ardhur në Presidencë dhe ekipi ligjor i Presidencës është duke e analizuar, për t’i propozuar Presidentes hapat e mëtejmë.

Mosmiratimi i këtij raporti nga PDK, LDK, AAK dhe abstenimi i Listës Serbe, detyroi kryesuesin e seancës konstituive të ndërpresë punimet dhe të kërkoj sqarime nga presidenca për veprimet e mëtutjeshme.

Rregullorja e Kuvendit përcakton që një seancë e re duhet të thirret brenda 48 orësh, që do të thotë se seanca e re duhet të mbahet më së voni deri të enjten, më 17.04.2025.

Zyra Rregullatorit të Energjisë e Kosovës (ZRRE) ka miratuar tarifat e reja energjetike, të cilat janë shtrenjtuar për 16.1 %  krahasuar me çmimin aktual.

Me tarifat e reja që do të hyjnë në fuqi me 1 maj, konsumatorët që shpenzojnë deri në 800 kilovatë brenda një muaji do të paguajnë 9.05 centë për kilovat nga 7.79 centë sa paguajnë aktualisht.

Ndërsa për ata që shpenzojnë më shumë se 800 kilovatë, kilovati do të kushtojë 15.43 centë nga 14.45 sa është aktualisht.

Gjithashtu rritje të çmimit do të ketë edhe për tarifat e shpenzimit të energjisë gjatë natës. Kështu, në periudhën nga 1 prilli deri më 30 shtator, nga ora 23:00 deri në 08:00 të mëngjesit, çmimi i ri për kilovat do të jetë 3.88 centë për ata që shpenzojnë deri në 800 kilovatë. Ndërkaq, ata që shpenzojnë më shumë se 800 kilovatë do të paguajnë 7.21 centë për kilovat nga 6.81 centë sa paguajnë aktualisht.

ZRRE-ja më 11 prill miratoi kërkesat e tre operatorëve energjetikë për të hyrat e lejuara maksimale, pasi sipas KOSTT, KEDS dhe KESCO, ngritja e çmimit të rrymës është i domosdoshëm për shkak të importit të energjisë elektrike.

Shtrenjtimi i rrymës u kundërshtua si nga bizneset ashtu edhe nga grupet e qytetarëve të cilët edhe protestuan disa herë para se ZRRE-ja të merrte vendimin për ndryshim të çmimit të energjisë.