Edhe këtë vit në të gjitha shkollat e vendit ora e parë e mësimit i është kushtuar Epopesë së Ushtrisë Çlirimtare të Kosovës, përkatësisht sfidave dhe rrugëtimit të gjatë të UÇK-së deri te shpallja e pavarësisë së Kosovës.

Në 22 vjetorin e Epopesë së UÇK-së, heroizmit të komandantit legjendar Adem Jashari dhe gjithë dëshmorëve të kombit, mësimdhënësit me shumë përkushtim ua shpjeguan nxënësve historinë, sakrificën dhe vlerat e kombit shqiptarë.

Edhe pse janë gjeneratë shumë e re, nxënësit e klasës së katërt të shkollës fillore “Jeronim de Rada” në Ferizaj, kishin mjaftë informacione për Epopenë  e lavdishme të UÇK-së. Të nxitur nga mësuesja e tyre, ata patën shumë përgjigje për emblemën e UÇK-së.

“Çka paraqet kjo foto?”, pyeti mësuesja, duke ua prezantuar nxënësve emblemën e UÇK-së.

“UÇK-në, lirinë, dashurinë për atdhe,  luftën, dëshmorët të cilët luftuan për liri, Adem Jasharin“, ishin përgjigjet e nxënësve.

Mësuesja Nazmie Aliu, tha se është mirë që mbahet kjo orë historike, pasi nxënësit duhet të dinë sakrificën e familjes Jashari, por edhe të gjithë dëshmorëve të cilët na e sollën lirinë.

“Çdo përvjetor është bërë si traditë që ne të rikujtojmë luftën e lavdishme të ushtarëve tanë të UÇK-së dhe pikërisht tek nxënësit mbjellim dashurinë kur rikujtojmë sakrificën e familjes Jashari dhe flijimtarëve të tjerë. Nxënësit kanë deri diku njohuri, por burimet kryesore i marrin nga shkolla“, tha Aliu.

Edhe në klasën e tretë në këtë shkollë, mësimdhënësi Agim Shehu u shpjegoi  këtyre filloristëve për historikun e datës 5, 6 dhe 7 mars.

“Është një emocion i veçantë, po festohet 22 vjetori i Epopesë së UÇK-së dhe me nxënës po bisedojmë për atë se çka ka ndodhur para 22 viteve. Këta të gjithë kanë lindur pas luftës, por disa kanë njohuri pasi familjarët e tyre kanë qenë pjesëmarrës të luftës dhe janë në dijeni mjaftë shumë, dinë të tregojnë se kush ka qenë UÇK-ja“, tha Shehu.

Mësimdhënësit Aliu dhe Shehu thanë se në tekstet shkollore ende mungon historia për familjen Jashari dhe për UÇK-në, gjë e cila, sipas tyre, duhet të bëhet sa më parë.

“Materiale kemi pak nëpër librat tona, po shpresojmë që në të ardhmen do të ketë, megjithatë mësuesit e ngulitin thellë në zemrat e tyre dhe në shpirtin e fëmijëve që mos të harrohet puna e lavdishme e UÇK-së, jam e bindur që emblema e UÇK-së është e mbjellur  tani në zemrat e fëmijëve. Fatkeqësisht që nuk është deri më tani e shkruar,  e që të paktën të jetë sado pak voluminoz  dhe do të ishte shumë e mirëseardhur“, tha Aliu.

“Mungojnë gjërat, por besoj se në të ardhmen do të shtypet më shumë në librat tona dhe të mësohet më shumë për UÇK-në”, theksoi Shehu.

 Se nxënësit  e shkollave fillore kanë të mbjellur në zemrat e tyre dashurinë për vendin e dëshmojnë edhe punimet e ndryshme historike të tyre, të cilat janë të vendosura në mure dhe nëpër dyer të klasave.