Projekti “Bashkimi
Qytetit”, përveç aspektit të sigurisë, nuk ka lënë pa u përcjellur me
probleme edhe në aspektin ligjor. Thuajse menjëherë pas fillimit të punimeve në
këtë projekt, Gjykata Themelore e Ferizajt me kërkesë të INFRAKOS-it vendosi
masën e sigurisë në parcelat që menaxhohen nga ky institucion duke atakuar
direkt edhe projektin “Bashkimi i Qytetit”.
Madje, për këtë rast është mbajtur edhe seancë
gjyqësore. Gjykatësi i këtij rasti Ardian Ajvazi, tregon se Gjykata Themelore e
Ferizajt kishte vendosur që të mbetet në fuqi masa e sigurisë, ku më pas komuna
e Ferizajt i është drejtuar edhe Gjykatës së Apelit shkallë kjo në të cilën
komuna pati dalur humbëse.
“Propozuesi INFRAKOS-i me datën 07.12.2018 ka parashtruar propozim
për caktimin e masës së përkohshme në parcelat ku është edhe “Bashkimi i Qytetit” me numër
02787, sipas këtij propozimi për masë të përkohshme Gjykata me aktvendimin e
saj të datës 12. 12 2018 e ka aprovuar
një propozim të tillë si të bazuar dhe ka caktuar masën e përkohshme të
sigurimit dhe ia ka dorëzuar palëve në procedurë. Kundërshtarja, në këtë rast
komuna e Ferizajt, e ka kundërshtuar aktvendimin mbi caktimin e masës së
përkohshme dhe Gjykata ka caktuar seancën për shqyrtimin e këtij vendimi se a
me lënë në fuqi apo me shfuqizu. I ka thirrur palët në seancë gjyqësore që
është mbajtur më datën 22.01.2019, palët në këtë seancë i kanë parashtruar
pretendimet e tyre dhe më pastaj me aktvendimin e datës 22.01.2019 kjo Gjykatë
e ka lënë në fuqi vendimin paraprak dhe masën e përkohshme të sigurisë e ka zëvendësuar me masë të sigurimit të kërkesë-padisë.
Kundër këtij aktvendimi komuna e Ferizajt ka bërë ankesë, ndërsa Gjykata e Apelit
përmes aktvendimit të saj nr 792\2019 të datës 05.03.2019 e ka refuzuar ankesën
dhe e ka vërtetuar aktvendimin e kësaj gjykate mbi caktimin e masës së
sigurimit të kërkesë-padisë”, tha Ajvazi.
Por, problemi mes komunës së Ferizajt
dhe INFRAKOS-it si duket se tashmë është mbyllur. Kjo pasi INFRAKOS-i ka
tërhequr padinë, siç theksohet, pasi kanë arritur të bëjnë njëfarë marrëveshje
me komunën e Ferizajt.
“Sa ka qenë kjo në procedurë sipas ankesës, INFRAKOS-i na e ka dërguar një parashtresë
mbi tërheqjen e padisë dhe kjo lëndë besoj se është kryer”, tha Ajvazi.
Përkundër që në aktvendimin e
Gjykatës Themelore të Ferizajt ishte e qartë se masa e sigurisë ka përfshirë
edhe parcelën e hekurudhave në qendër të qytetit, përkatësisht tek punimet e
projektit “Bashkimi i Qytetit”, drejtori i Infrastrukturës në Ferizaj
Arbër Bytyqi, vazhdon ta mohojë këtë, duke thënë se masa e sigurisë ka qenë
vetëm për nënkalimet e tjera dhe zgjerimin e rrugës Gërlicë-Varosh. Kurse sa i përket marrëveshjes që kanë
arritur me INFRAKOS-in për tërheqje të padisë, Bytyqi thotë se nuk ekziston
asnjë marrëveshje e tillë.
“Asnjë mosmarrëveshje nuk e kemi pasur me INFRAKOS-in sa i përket
projektit “Bashkimi i Qytetit”, mosmarrëveshja ka qenë zgjerimi i
rrugës Gërlicë-Varosh dhe tri nënkalimet e tjera të cilat ende nuk kanë
filluar. Çështja kontestimore ka qenë se si do të ndërtohen pasi që në pjesën
ku do të ndërtohen këto tri nënkalime është vetëm një binar dhe ata kanë pasur
shqetësimet e veta se si do të bëhen punimet, si dhe ka qenë një problem i
stafit të brendshëm pa koordinim mes vete të INFRAKOS-it pasi zyra ligjore ka
ngritur padi për këto tri nënkalime dhe për rrugën Gërlicë-Varosh, por në
takimin e radhës kemi sqaruar ku është mosmarrëveshja, ata kanë kërkuar që vija
minimale nga hekrurudha të largohet rreth 7 metra dhe ne jemi dakorduar që
zgjerimi i kësaj rruge të bëhet 7 metra larg, po ashtu për nënkalimet jemi
dakorduar t’i bëjmë në bashkërendim me ta kur ata do të kenë mundësi të na
japin një kohë një muaj dhe ne të fillojmë punimet, prandaj ne ende nuk kemi
filluar punimet në këto nënkalime. Kurse, sa i përket projektit ”Bashkimi i
Qytetit” nuk kemi pasur asnjë mosmarrëveshje me Hekurudhat
e Kosovës, gjithçka ka qenë e qartë, para fillimit të projektit ne kemi
marrë pëlqimin nga ta, ata janë dakorduar na i kanë lëshuar edhe kushtet
teknike se si duhet të jetë nënkalimi në pjesën e hekurudhës”, tha Bytyqi.
Punimet në projektin “Bashkimi i Qytetit”, kishin
filluar në shtator të vitit 2018. Ky projekt në vlerë rreth 4 milionë euro së
fundi është zgjeruar duke gëlltitur edhe parcelën e Shoqatës së Pensionistëve,
ndërsa ka paralajmërime se së shpejti do
të rrënohet edhe objekti i vetëm ku funksionojnë shoqatat “Hendifer”
dhe “Handikos” afër parkut të ish-çerdhes së fëmijëve në rrugën
“Ramadan Rexhepi” .
