Derisa opozita po e akuzon Drejtorinë e Bujqësisë në Ferizaj për keqmenaxhim, drejtori i kësaj drejtorie Burim Bajrami, në një konferencë të thirrur për media, numëroi të arriturat që, sipas tij, drejtoria të cilën ai e udhëheq i ka shënuar gjatë këtij viti.
“Kemi pasur risi shumë, mbjellja e drunjve dekorativ, mandej vaksinimi i fondit blegtoral kundër sëmundjes clostridiale, mandej delmatizimi i fondit blegtoral, rikthimi i vaksinimit kundër tërbimit, mandej marrëveshjet që i kemi bërë me IKC-në dhe JADK-në, kemi bërë për herë të parë një pikë përpunuese të pemëve dhe perimeve, kemi kryer trajnime të vazhdueshme për fermerët e komunës sonë që u kanë hyrë në punë shumë, mandej një projekt që është inovativ është korrigjimi i thundrave, që ka qenë një projekt i cili ka pasur një rol të jashtëzakonshëm”, tha Bajrami.
Bajrami, tha se për vitin 2019 kanë paraparë disa projekte, të cilat, sipas tij, do të realizohen për herë të parë në Ferizaj.
“Kemi projekte shumë të mira tek pemëtaria, do të investojmë në sigurimin nga dëmet nga breshëri, që kemi kontakte me organizatën ADA nga Austria, janë sisteme mekanike kundër breshërit dhe diellit të fortë dhe projektin e mekanizimit bujqësor që do të investojmë mjaftë shumë aty, mandej projektet e zakonshme që kanë qenë si investimet në serra, krerë lope e projekte të tjera, ndërsa si risi do të jetë mbarësimi artificial që do të sigurohet për të gjithë fermerët pa dallim, mbarësimi artificial do të prek të gjithë fermerët me qëllim që të fisnikërohen racat që janë brenda teritorit tonë”, tha Bajrami.
Ndër projektet që kjo drejtori u tha se planifikon t’i realizoj gjatë vitit 2019 është rregullimi i një tregu ditor për shitjen e produkteve bujqësore, si dhe strehimore për qentë endacakë.
