”Java e Lëvizshmërisë” që ka për qëllim të promovoj lëvizjen me biçikleta, ka nisur edhe në komunën e Ferizajt. Adhurues të biçikletave sot kanë marshuar rrugëve të Ferizajt për të sensibilizuar qytetarët që të përdorin sa më pak veturat, për shkak të ndotjes që shkaktojnë ato.
Arianit Jashari, pjesëmarrës në këtë aktivitet, tha se shumë pak e përdor makinën, pasi biçikleta përveç kënaqësisë që i ofron, i sjellë edhe shumë benefite të tjera.
“E përdori biçikletën mjaftë shumë dhe pikërisht sot në këtë ditë që po bëhet apel tek qytetarët që të përdoret më shumë biçikleta edhe unë u kisha sugjeruar, sidomos të rinjve, që të përdorin sa më shumë biçikletën pasi ka shumë anë pozitive, është efikase sidomos nëpër qytet, pa shpenzime, ndihmon edhe shëndetin dhe ruan edhe ambientin”, tha Jashari.
Zymer Mrasori nga Ministria e Mjedisit dhe Planifikimit Hapësinor, kërkoi nga qytetarët që të përdorin sa më pak mjetet motorike, në mënyrë që të ruhet ambienti.
“Qëllimi i kësaj jave ka të bëj kryesisht me sensibilizimin e qytetarëve gjegjësisht ngritjen e vetëdijes dhe ndërgjegjësimit sa i përket përdorimit të mjeteve motorike të cilat shkaktojnë ndotje në mjedis, e posaçërisht vetëdijësimit për mospërdorimin e makinave dhe shfrytëzimin e mjeteve alterantive, biçikletën, trotinetin, transportin publik, do të thotë automjete të cilat shkaktojnë zero ndotje në mjedis”, tha Mrasori.
Edhe Kenan Gashi bashkëorganizator i këtij akviteti, tha se mjedisi është faktor i rëndësishëm për jetën e njeriut, prandaj duhet të kontribuohet në ruajtjen e tij.
“Sot është e rëndësishme që të gjithë qytetarët të japin mundësinë që mos të lëvizin me automjete, por të lëvizin në këmbë apo me biçikletë për shkak që të ulet ndotja e mjedisit, prandaj nëpërmjet këtij aktiviteti të japim mesazhe që mjedisi është një ndër faktorët më të rëndësishëm për jetë”, tha Gashi.
”Java e Lëvizshmërisë” në Kosovë që po mbahet në shtatë komuna të Kosovës ka filluar dy ditë më parë. Ky projekt është duke u zhvilluar në kuadër të Bashkimit Evropian.
