Listës së fryer të veteranëve të Ushtrisë Çlirimtare të Kosovës, nuk i ka shpëtuar as komuna e Ferizajt. Në këtë komunë dyshohet se janë rreth 400 veteranë më shumë sesa numri real. Kryetari i Organizatës së Veteranëve të Luftës në Ferizaj, Rafiz Sejdiu, tha se numri i veteranëve është rritur dukshëm në Ferizaj, mirëpo krahasuar me zonat tjera komuna jonë qëndron më mirë.
“Nuk ka dyshim se numri i veteranëve është tejet i rritur, ajo çka di unë për zonën operative të Nerodimes menjëherë në fund të luftës kemi pasur një numër prej 2800 veteranë me armë dhe pa armë, por me gjasë tani kur janë dhënë certifikatat e vetranëve ky numër është tejkaluar, edhe pse nuk është shumë në krahasim me zonat e tjera, por për bindjen time janë 300-400 vetë më shumë në komunën e Ferizajt, apo në zonën e Nerodimes”, tha Sejdiu.
Sejdiu thotë se fryrja e listave të veteranëve ka ndodhur nga partitë politike.
“Për bindjen time këtu ka qenë një vendim politik që e ka bërë këtë fryerje të listave, kur është dashur të kaloj ligji për luftën nuk ka pasur vota të mjaftueshme në Kuvend prandaj janë bërë kompromise mes partive politike, ne do ta votojmë me kusht që të futen në listë edhe forcat e rendit si veteranë edhe të ashtuquajturit FARK si veteranë edhe ata të tre përqindëshit, pastaj kanë hy edhe ata të fondit “Vendlindja Thërret” dhe është rritur numri i veteranëve dhe kur e ka pa tani komisioni se janë veteranë që s’kanë qenë në luftë, madje s’kanë qenë në Kosovë fare gjatë luftës dhe tani duket e kanë ulur kriterin. Për të korrigjuar këto lista nëse nuk merret ndonjë vendim politik vështirë se gjykata mund ta bëj punën, prandaj është domosdoshmëri që duhet të bëhet korrigjimi i listave të veteranëve dhe unë e mbështes punën e prokurorit, ne si degë e kemi mbështetur prokurorin në atë vijë dhe ia kemi dhënë të gjithë dokumentacionin që e kemi pasur në dispozicion, prandaj ne jemi këmbëngulës se kjo punë duhet të vazhdohet, prokurori e bëri një pjesë të mirë të punës, por është dashur ta bëj edhe pjesën tjetër të punës, mos të ikë, por ta kryej punën që kishte nisur”, tha Sejdiu.
Ndërsa, Bashkim Fazliu, ish-luftëtar i UÇK-së, thotë se për listat e fryra duhet të reagojnë veteranët e vërtet, në mënyrë që të mos lejohet që njerëzit të cilët nuk kanë dhënë kurrfarë kontributi në luftë të marrin statusin e veteranit.
“Qysh para dy viteve me tu publikuar lista unë kam pasur një reagim ku i kam kualifikuar dy kategori të veteranëve, veteranët e vërtet ku janë në një numër shumë më të vogël dhe veteranët politik ku dalin në numër më të madh, ku do të thotë se veteranët politik u janë dashur individëve apo partive për vota dhe sigurisht barra i bie komisionit, unë kam thënë edhe për veteranët falso, për të cilët nuk bënë me ju thanë edhe veteranë, pasi është fyerje për dëshmorët e veteranët e vërtet, le të mbledhen të gjithë luftetarët secili me njësi të vetën ku e bëjnë vendin ata që nuk janë kanë në luftë, apo veteranët falso”, tha Fazliu.
Sipas të dhënave të Ministrisë së Punës dhe Mirëqenies Sociale, për shtatë muajt e parë të këtij viti për këtë kategori janë ndarë më shumë se 44 milionë euro. Në muajin janar nga kjo skemë kanë përfituar 36,794 veteranë me një vlerë rreth 6.3 milionë eurosh, kurse në muajin korrik numri përfituesve është rritur në 37.771, për të cilët nga buxheti janë ndarë rreth 6.4 milionë euro.
