Fëmijët e të gjithë botës kërkojnë sot vëmendjen e prindërve dhe institucioneve. Kjo ditë është kthyer jo vetëm në një ditë festive, por edhe në një ditë sensibilizimi, për t’i thënë jo dhunës dhe abuzimit ndaj fëmijëve. Është dita kur vetë fëmijët ngrenë zërin për të drejtat e tyre, por për ndryshim nga të rriturit, protesta e tyre bëhet me lojëra festive.
Kjo ditë ndërkombëtare e fëmijëve u shënua edhe në qytetin e Ferizajt, me një mori aktivitetesh nga nxënësit e shkollave të Ferizajt, të cilët përmes performancave e defileve të ndryshme festuan këtë ditë.
“Besoj që të drejtat tona janë maksimalisht të zbatuara, po ashtu edhe të drejtën e fjalës”, tha Diana Mehmeti, nxënëse e shkollës së muzikës “Çesk Zadeja”.
Nënkryetari i komunës së Ferizajt Naim Ferati, uroi që 1 qershori i ardhshëm të shënohet me kushte më të mira për fëmijët, duke shprehur zotimin e qeverisë lokale për avancimin e të drejtave të fëmijëve.
“Duke uruar që vitet e tjera festat e ardhshme, 1 qershoret tjerë të na presin në kushte shumë më të mira me avancim më të madh të të drejtave të fëmijëve kudo në botë, me mirëqenie më të mirë, me shëndetësi më të mirë, me kushte më të mira në shkolla e çerdhe për të gjithë fëmijët tanë. Si qeveri komunale, si ekip po bëjmë përpjekje që të bëjmë punë, angazhim, strategji e politika që të krijojmë sa më shumë mundësi në zhvillimin dhe avancimin e të drejtave të fëmijëve dhe të gjithë qytetarëve të Ferizajt”, tha Ferati.
Ditën Ndërkombëtare të Fëmijëve me aktivitete e shënoi edhe shoqata “Handikos”. Menaxherja e kësaj shoqate në Ferizaj Xhemile Murseli, u shpreh e pakënaqur me mosrespektimin e të drejtave të fëmijëve me nevoja të veçanta.
“Situata e fëmijëve me aftësi të kufizuar mbetet ende e pakënaqshme, ne si organizatë, jemi një nga organizatë që ofron shërbime për fëmijët me aftësi të kufizuar dhe në kuadër të projekteve e shërbimeve mundohemi t’i mbështesim fëmijët që të përfshihen në shkolla e në shoqëri, po ashtu edhe familjet që të avokojnë për të drejtat e fëmijëve të tyre”, tha Murseli.
Për nderë të kësaj dite, ‘’Handikos’’-i bashkë me disa artistë ferizajas, ishin angazhuar për punime artistike.
“Ka disa vite që bashkëpunojmë me “Handikos”-in, vitin e kaluar e kemi pas një aktivitet me fëmijë duke bërë vizatime, ndërsa sot në bashkëpunim me artistë dhe fëmijë të realizojmë një kolazh një punim me ngjyra që ka si tematikë gjithëpërfshirjen që asnjë fëmijë nuk ka dallime, por janë të gjithë të barabartë”, tha Lebibe Topalli.
‘’Handikos’’ ishte përkujdesur që në këtë ditë të shes edhe produkte ushqimore, paratë e të cilave do të përdoren për nevoja të fëmijëve të kësaj shoqate.
